لا تستغرب

لاتستغرب وتسأل عن غيابي اذا ما طال 

انا اتعبني تبريرك  وهجرانك وأسئلتك

تراه الصدق بالأفعال ماهو صدق بالأقوال

واناحاولت الاقي عذر لاجيتك وحصلتك

انا ماعاد فيني صبر للأحمال والأثقال

كثر ماشفت منك شي اوجعني وتحمّلتك 

أنا ملّيت أزرع بالأمل واثر الليالي طوال

سقيتك من شراييني وشفني وين وصّلتك

دروبي في الأمل فاقت بعتمة ليلنا أهوال

تعيد الأمس وايامه ، تذكّرني بمقدرتك

وانا ماعاد فيني حيل للأحلام والآمال

لجل ماقول في قصة هوانا يوم جاملتك

أغيب واختفي عنك اذا حسيت بالإذلال

انا ماجيت ادور عطفك ورحمة معاشرتك

ابقطع عن علاقتنا بقايا البث والإرسال

واذا شفتك بصدفة زين  لو اني تذكّرتك

محمد العليان

الناس

الناس الي تعامل الناس بسياسة

هي مصلحتهم تلمّعها وتصدّيها

هم يحسبون البشر أوراق نقدية

وبكيف أرباحها الرِفقة تودّيها

كل ظنّهم  يخدعون الناس بأوهامٍ

أخطائها في مكاسبهم ترَدّيها

يبرّرون الأساليب بمواقفهم

حتى الخطا لا انكشف لا ما تبدّيها

هم يلبسون الصفا بأعلى مراتبها

يامَنهم الطيّب و دايم يعدّيها

هم يزرعون الوفا حتى بلا قيمة

دستورهم قد قضى فيها مباديها

في كل صبح وعشية يذكرون الله

والذِكر ماقد نهاها عن تماديها

العمر مابين روحة تاتي وجيّة

والناس في ظنّها تجمع و يمديها

مافكّروا بشرع رب الناس وحقوقه

وحقوقها الناس يمكن ما تناديها

متسابقين على دنيا الردا فيها

والاخرة كنها أصعب تحديّها

يالله لا تبتلينا بالعمى هذا

وارحم لقانا وهذي النفس اهديها

كلماتي

محمد ناصر العليان

[ماهيّض العبرات]

[ماهيّض العبرات]

نعيش ذكرانا على ماهيّض العبرات

ذكرى صغارن ما معانا شي ونحاتيه

ذكرى قلوبن صافية نقوة على نقوات

ماتعرف الدرهم ولاالدينار وتدانيه

يالله تسقينا بهالأيام واللحظات

واجبر زمانن ياكثر من فيهم انعاديه

يالله تسترنا بيوم الحشر واللومات

يوم الذي ماتاب من عصيانه اتعرّيه

ويالله كثر الي بقى يدمحلي الي فات

ويالله ترحم هالزمان الي ربينا فيه

نعيش ذكرانا كذا نحيي به الي مات

لاصار قلبك بالعنا  فيه الذي مكفّيه 

كلماتي 

محمد ناصر العليان

[ انتظار العاشقين،، ]

[ انتظار العاشقين،، ]

لحظة بكاء جتني مع ساعة حزن

فيني هموم ومن زمن كله حزين

حالي مثل حال الطيور الي ارحلن

عابر سبيل وعايش بذكرى سنين

ضاع العمر والشوق في قلبي يحن

اتخيلك مابين رمش وبين عين

شفت بغيابك شي من ضعف و وهن

أبطيت لين استبدل الشك اليقين

معاد فيني صبر لدروب الزمن 

ماشفت انا مثل انتظار العاشقين

اكتم بصدري من تهاويل المحن

قمت احتريك بكل اشواق وحنين

من بعد ماغبت وتحاواني سجن

قلت انتظر بتزين بس الله يعين

لازلت أنا في حلمي بليّا وطن

فاقد أمل ، ومنتظر شيٍ يبين

ان جيت حيّا بك على قدر وثمن

وان رحت بدعي ربي بدونك تزين

محمد العليان

جيتك

[ جيتك ...،]

جيتك وانا فيني من الحب لهفة

لاتحرم اللهفة ولاتكسر الشوق

جيتك ادور من شفاياك طبّه

لوعة ألم وعلاجها قالو الذوق

مانيب طامع بس ضماي وتبلّه

بلّة خقوق وخاطري بعدها يروق

تدري حنيني لابغى منك وصلة

يعني يبيك تردّ له نبض  وعروق

هذي حياته أمنية كل عمره

نظرات عاشق تاهت بعين معشوق

تذكر زمن يوم التقينا بصدفة

ارواح تتلاقى بلا وعد مسبوق

لحظة لقانا صابها منك رجفة

وحارت عيون الشوق في داخل الموق

لا تبرد اشواقي أبي منك وصفة

جفت عروقي وامتلا قلبي احروق

كلمات

محمد العليان

تجاعيد البكي

"تجاعيد البكي"

رمشك وعينك بينهم زحمة حكي

وقلبك ترا ينبض روايات عشاق

واشوف في جفنك تجاعيد البكي

وفي نظرتك لمحة ضياع وبعد فاق

روحك تراها روح هالأم الوفي

حب وحنان وعاطفة وحيل مشتاق

وصلك بلا غيبة مثل نجم الجدي

مشفق على حضن يبي لمّة عناق

وانا ترا حضنك تعال واشتكي

وارمي على صدري جبينك بإطراق

فضفض وقول الي تبي والماتبي

واسمع بصدري دقة القلب لاراق

كلماتي

محمد ناصر العليان

قلّي أغيب اشلون

قلي اغيب اشلون عنّك وانساك

وانت الذي جرّعتني الحب إدمان

منهو الذي يغني عن رموش عينك

وبعينك الإحساس وافي بتحنان

هي راحتي عينك وحضنك ولقياك

وصلك عبارة عن احاسيس بجنان

شفني مثل غصنن ويذبل من جفاك

طوّل غيابك ياعسى الوقت قد حان

بصبر على فرقاك لحظة وداعك

لكن ابحفظ زولك بوسط الأعيان

بلغ خفوقي قبل ماتغيب عنّي

بنسا معك ذكراك ما زان أو شان

لاتعتذر وتبرر ظروف بعدك

بداوي بعادك أنا بكل نسيان

كلماتي

محمد العليان

[ قلب بوجهين ]

[ قلب بوجهين ]

ياصاحب القلب الملوّن بكم لون

ماهي قلوب الناس رسمة وتلوين

تتصنّع بكل الوفا لجل مضمون

خاين وتلعب لعبتك دون تخوين

تكتب بأنك للعشق صرت مسجون

وتزيدها مخمل  بكل العناوين

تتقن معاه العشرة تصير مأمون

ولامن خذاه الحب بين المساجين

تاخذ لك الحاجة وترميه في الدون

وتشوف لك قلب وتعيد التلاوين

هي لعبتك تبدا مع الناس بالعون

في الآخر و وجهك تبدّل بوجهين

وجهن مزيّف اسود وقاتم اللون

و وجهن بياضه طاهر ولمحته دين

من هو يدوّر قلبك ولجله يمون

اصلن حقير الي على نفسه يهين

وانا بعيش بعزّتي قلب م يخون

وان جيتني مانيب راعي تلاوين

محمد العليان

ليه يا قلبي

|°= ليه يا قلبي =°|

ليه ياقلبي عن عيوني تغيب

وانت عني دايم الدوم القريب

حبك الي بالشروق وبالمغيب

من بعد هجرك وانا عايش غريب

تذكر وعود المحبة ما تعيب

وفي كلامك عشق ماظنّي يخيب

كنت لجراحك دوا كنت الطبيب

وانت تقفي بي وانا بسهمك صويب

جرحي الي من لضا الفرقا لهيب

جرح , لكن فاح منّه ريح طيب

كلماتي

محمد العليان

لاعاد تطريني

لاعاد تطريني

لاعاد تطريني ولاعاد بطريك
أشره عليك ومايهمك ودادي

ملّيت أعاني واعتني بكل مافيك
جيتك بشوق ، وما يهمّك بعادي

انفاسي الي تتعب وهي تناديك
تشقى ولكن في شقاها تفادي

هي تنتظر لهفة رجوعك لمغليك
وتغيب عنها كنه الحال عادي

والا اذا مرتاح و ودك أخليك
وش لي أجامل واستمرّ بعنادي

جرّب تعلّم كيف هالحب يشقيك
يمكن وتفهم ليه دايم أنادي

جرّب تأكد نوري الي ضوا فيك
دنياك كيف تعيشها بدون زادي


محمد العليان

عزّمت ابرحل

خلاص 

خلاص انا عزّمت ابرحل واعلن اغيابي عليك

من بعدما شفته مكاني في وسط قلبك مماتي

أتعبتني اصبر على هجرانك وقلة سؤالك

واتعبت حلمي الذي غطّى على كل امنياتي 

لجلك انا ذقت المرارة شاهدة بقسوة يدينك

ولجلك انا اتجرعتها كن المرارة هي حلاتي

زاد الصبر على التعب أيام وشهور وسنين

وبالنهاية أثرها ضاعت معاها كل حياتي

في غيبتك أو في ظهورك كنت وافي ما خطيت

وانت الذي اخطا بحقي يوم تنسى كل ثباتي

تطلب وانا لبيت لك حتى لو المطلوب عيني

وان جيت في يوم وطلبتك الجفا وصدك جزاتي

من يوم حبيتك وانا لا ما أداري حب ثاني

الأول انت والأخير وبعدها بعلن وفاتي

روّح عسى ربي يسامح حبك الي قد خفيته

واستريح اكثر ترا فرقاك هي آخر وصاتي

محمد العليان 

قم يا حمد

يا حمد

كل يوم اكشف لي بالاصحاب هلاس

احسبه  مثل قلبي شفّاف و ألماس

واثره تفنن  بلعبة الناس الانجاس

اعرف نواياه وسطها السم منداس

من ينشدونك ياحمد غير هالناس

وحدي انا ماعاد أدور لجلّاس

والمشكلة قلبي مع الحب له ساس

لامايجامل وكل ما حب يحتاس

أوّاه ياطعنة مثل كسرة الكاس

سوّت بقلبي طلقة الغدر بالراس

قم ياحمد لحنّ كلامي بإحساس

واعزف عليها بالوتر عزف حسّاس

كلماتي

محمد العليان

نادني يا عليّان !

(دايم اشوفك )

كلمات/ محمد ناصر العليان  

اهداء الى الغالي
الشيخ عبدالعزيز بن محمد السبيعي ,,

_

دايم اشوفك ضايق البال مشغول

ودايم اشوفك جاهد النفس تعبان

كلما سألتك عيّت حروفك تقول

كلما قربت ألقى بك آلام وأحزان 

فضفض ترا حزنك مع الوقت بيزول

عمر الحزن مارافق بعمر الإنسان

ناظر على يمناك تلقا بها فعول

ذاك الكريم الي مثل غيث هتّان

ماضيّعك ربي على درب مجهول

وانت الذي ماشي على درب الإحسان

لكن انا في خاطري شي وباقول

شفني معك وش كان لوكان ماكان

واياك في درب الفرح عرضن وطول

واياك لو مالت بك اوقات وازمان 

اذكرني ان كانك تبي سيف مسلول

لجلك نبيع الروح ونصير فرسان

ماني على وقت الرخا بس مجبول

في كل وقتك نادني يا علّيان

أنا ياصاحبي

[أنا ياصاحبي ]

أنا ياصاحبي ببقى على ذاك العهد واياك
صحيب ومن صفا قلبه لا مايطعن ومايخون

ومهما شاف بالدنيا مآسي من ظروف الناس
ترا هذي الحياة اما تجيك حروب والا فنون

مزيّن روحه بنصحه وروحه لوتبي تفداك
يدلّك في دروب الوقت والدنيا تراها متون

صحيب ومن رجال قروم ونسله يشهد بأصله
خذا تاريخ جدّانه بنا أمجادهم بحصون

كلامه ماتغيّر لو تغيّر في الذهب لونه
وتبقى كلمته تبرق , ولو يغرون مايغرون

وله طبع الوفا يشهد كل الي يعرفونه
وعشرة عمر عنده لو يطول العمر لا ماتهون

بعينه عشق مايبلى وغرام بداخله وقّاد
ترا إحساسه ومرسوم في قلبه بأجمل لون


محمد العليان

صدمة وراء صدمة

 ( صدمة وراء صدمة )

صدمة ورا صدمة ورا صدمات 

ايام لي ماغير اسمع بصدمات

االأولة  خلتني ابكي و بـ شتات 

شكيت ربي ظلم جاني من طغات

الثانية بقلبي طيّب النيّات

وكّلت رب الأرض هي والسماوات

الله يعلم حالتي جهد وآهات

مكتوب كل خطوة-تعب عشر خطوات

بعض البشر خطوة ويقول ما جات

لو ضاع عمري مادرا ضاع او فات

الظلم ربي حرمّه وقدّس الذات

وعلى البشر منكر وآفة الآفات

هي دعوة المظلوم تلقى الإجابات

ربي نصرها فوق سبع السماوات

في دنيته يبلاه ربي بعقوبات

وينال يوم الحشر كل المهانات 

يالله تجبر خاطري بكل فرحات

قد التعب يارب عوّضني مافات

الشاعر

محمد العليان

يا مسلم

 [ يامسلم ]

يا مسلم لا ترفع عيونك على الناس
الكل من حولك عباده و خلق الله 

الكبر والملك لله هو عظيم الباس
الي رفع قيمتك لاصرت تنزل له

وشهو مخليك تتكبر بلا احساس
تطغى وتنكر نعم ربك بأي ملّة ؟

مخلوق من طين منتب من ذهب والماس
وتدفن به الطين من علة وبلا علة

لايغرّك الوقت والدنيا وكبر الراس
الله كسّر رؤوس اقوام بالذلة

احرص على الي يفيدك وسط هالقرطاس
هذا كتابك بفعل الخير قم ملّه




كتبه
محمد العليان

[ زمان قل فيه الرفيق الوفي ]

[ زمان قل فيه الرفيق الوفي]

لا رفيق ولا عشير , لا حبيب ولا صديق 

وحشتي في ضيقتي مابين شمسي والمغيب

ادمحت عيني زمان كل ماله زاد ضيق

عايش بعمري لوحدي في البشر مالي صحيب

عشت في دنيا لوحدي ماشي بذاك الطريق

والوجيه الي ملاها كذب تنظر لي بريب

دمعة بعيني على وقت الوفا وين الرفيق

شفت من زيف المعاني كلها بإسم الحبيب

وين ياذاك الخفوق الصادق العف العشيق

غير عن كل القلوب وعاطفة منها تطييب

محمد العليان